کس طرح ترک دوستی کر لوں

کس طرح ترکِ دوستی کر لوں

اپنے دل سے ہی دشمنی کر لوں

چند لمحوں کو مجھ سے بات کرو

چند لمحوں میں زندگی کر لوں

تم بھی اپنی سی کچھ خوشی کر لو 

میں بھی اپنی سی کچھ خوشی کر لوں

مطمئن ہے وہ اس جدائی سے

کس طرح آنکھ میں نمی کر لوں

تم بھی کچھ تو کرو مسیحائی

میں ہی کیوں درد میں کمی کر لوں 

اور کچھ دیر مجھ کو یاد آؤ

اور کچھ دیر شاعری کر لوں

آو کچھ پل کو سوچ کر تم کو

اپنی ہر سوچ چاندنی کر لوں

آنکھ سے تو میں رو نہیں سکتا

کیوں نہ ہر لفظ شبنمی کر لوں

میں تری سوچ کے اجالے سے

دل کے آنگن میں روشنی کر لوں

عاطف سعید