محبت کی ایک نظم
جان جاں کچھ کہو
خامشی کی زباں سنتے سنتے مرے کان تھکنے لگے
جانتا ہوں محبت میں اظہار، کب کھوکھلے حرف و معنی کا محتاج ہے
مانتا ہوں محبت وہ احساس ہے
جس میں خاموشیاں بات کرنے لگیں
روح سننے لگے دھڑکنوں کی زباں
پھر بھی اب جان جاں
خامشی کی زباں سنتے سنتے مرے کان تھکنے لگے
کچھ کہو
شرمگیں مسکراہٹ میں لپٹی ہوئی ہجر کی داستاں
وسوسوں میں گھرا، آنسوؤں سے لکھا دھڑکنوں کا بیاں
اپنے جذبوں کو لفظوں کی پوشاک دو
ٹوٹا پھوٹا سہی، الجھا الجھا سہی
کوئی اظہار ہو
کیونکہ اب جان جاں
خامشی کی زباں سنتے سنتے مرے کان تھکنے لگے
عاطف سعید
No comments:
Post a Comment