بستی میں دیوانے آئے
بستی میں دیوانے آئے
چھب اپنی دکھلانے آئے
دیکھ ترے درشن کے لوبھی
کر کے لاکھ بہانے آئے
پِیت کی رِیت نبھانی مشکل
اٹھ اور کھول جھروکا گوری
سب اپنے بیگانے آئے
پیر، پروہت، مُلا، مکھیا
بستی کے سب سیانے آئے
طعنے، مہنے، اینٹیں، پاتھر
ساتھ لئے نذرانے آئے
سب تجھ کو سمجھانے والے
آج انہیں سمجھانے آئے
اب لوگوں سے کیسی چوری؟
اٹھ اور کھول جھروکا گوری
درشن کی برکھا برسا دے
ان پیاسوں کی پیاس بجھا دے
اور کسی کے دوار نہ جاویں
یہ جو انشاؔ جی کہلاویں
تجھ کو کھو کر دنیا کھوئے
ہم سے پوچھو کتنا روئے
جگ کے ہوں دُھتکارے ساجن
تیرے تو ہیں پیارے ساجن
گوری روکے لاکھ زمانا
ان کو آنکھوں میں بٹھلانا
بجھتی جوگ جگانے والے
اینٹیں پاتھر کھانے والے
اپنے نام کو رسوا کر کے
تیرا نام چھپانے والے
سب کچھ بوجھے، سب کچھ جانے
انجانے بن جانے والے
تجھ سے جی کی بات کریں کیا
اپنے سے شرمانے والے
کر کے لاکھ بہانے آئے
جوگی الکھ جگانے والے
دیکھ نہ ٹوٹے پِیت کی ڈوری
اٹھ اور کھول جھروکا گوری
ابن انشا
No comments:
Post a Comment