Monday 19 February 2018

زلف پر خم کھینچ کر شمشیر کھینچ

زلفِ پُر خم کھینچ کر شمشیر کھینچ
دل بھی کھنچ آئے گا تُو زنجیر کھینچ
اور ترکش سے نا تُو اب تیر کھینچ
ذبح کر دے، گردنِ نخچیر کھینچ
کیا مصور سے کھنچے تیری ادا
آئینہ میں عکس کی تصویر کھینچ
کھینچ کر لا عرش سے تاثیر کو
یوں نا اے دل نالۂ شب گیر کھینچ
آزما پہلے ادا کو، ناز کو
کون کہتا ہے، ابھی شمشیر کھینچ
مجھ کو بندِ زلف کافی ہے ترا
پاؤں سے ظالم مِرے زنجیر کھینچ
دل جگر پہلو میں، دونوں چھِد گئے
دیکھ کر بڑھ کر سنبھل کر تیر کھینچ
کہہ دے قاصد! جلد جو اس نے کہا
یوں نا آہیں تُو، دمِ تقریر کھینچ
دل بھر آیا دیکھ کر خطِ جبیں
اس پہ خط، اے کاتبِ تقدیر کھینچ
اس بتِ بدخُو سے کیا چشمِ وفا
تُو بھی دل اے بیدل! دلگیر کھینچ

بیدل بیکانیری
عبداللہ بیدل

No comments:

Post a Comment