آسان راستہ ہو یا دشوار، مسترد
اے عشق تیرا فلسفہ بےکار، مسترد
لوگوں کی عام تام سی تخلیق، واہ واہ
میرے تراشے سارے ہی شاہکار مسترد
میں تیرے ہاتھ لگ گیا مالِ غنیم سا
پھر تیرے ہاتھ سے ہوا ہر بار مسترد
اس بار دل کی ماننے دے بدمزاج عشق
اس بار تیرا وصل سے انکار مسترد
جلنے دو جسم دھوپ میں اب ضد کی بات ہے
وہ گھر تو کیا، وہ سایۂ دیوار مسترد
زندہ ہیں لوگ بس ذرا مردہ ضمیر ہیں
اے زیست تیرے جینے کے معیار مسترد
No comments:
Post a Comment