Wednesday 9 May 2018

کسی کا دھیان مہ نیم ماہ میں آیا

کسی کا دھیان مہِ نیم ماہ میں آیا 
سفر کی رات تھی اور خواب راہ میں آیا 
طلوعِ ساعتِ شبخوں ہے اور میرا دل 
کسی ستارۂ بد کی نگاہ میں آیا 
مہ و ستارہ سے دل کی طرف چلا وہ جواں 
عدو کی قید سے اپنی سپاہ میں آیا 
جہادِ غم میں کوئی سُست ضرب میری طرح 
گرفتِ میسرۂ اشک و آہ میں آیا 
ستارے ڈوب گئے اور وہ ستارہ گر 
تھکن سے چُور زمیں کی پناہ میں آیا 
چراغ ہے مری راتوں کا ایک خواب وصال 
جو کوئی پل تری چشمِ سیاہ میں آیا 
دکھی دلوں کی سلامی قبول کرتے ہوئے 
نظر جھکائے کوئی خانقاہ میں آیا

احمد جاوید

No comments:

Post a Comment