ہزار آرائشیں کیجئے مگر اچھا نہیں لگتا

ہزار آرائشیں کیجیے، مگر اچھا نہیں لگتا
جو دل وحشت بداماں ہو، تو گھراچھا نہیں لگتا
خوشی میں بھی نکل آتے ہیں اکثر آنکھ سے آنسو
یہ بے موقع مذاقِ چشمِ تر اچھا نہیں لگتا
نمائش جسم کی، بے پیرہن اچھی نہیں ہوتی
خزاں کے دور میں، کوئی شجر اچھا نہیں لگتا
یہ آئینہ ہے، سب کے منہ پہ سچی بات کہتا ہے
نگاہیں پھیر لو، تم کو اگر اچھا نہیں لگتا
سوادِ قریۂ جامِ تغیر بھی ضروری ہے
کوئی موسم ہو لیکن عمر بھر اچھا نہیں لگتا
بھلا لگتا ہے جب تک پھول، پھولوں میں رہے شامل
ستارہ آسماں سے ٹوٹ کر اچھا نہیں لگتا
حصارِ ذات سے اعجازؔ! جو باہر نہیں آتے
انہیں کوئی بالفاظ دِگر اچھا نہیں لگتا

اعجاز رحمانی