سبھی کہیں مرے غم خوار کے علاوہ بھی

سبھی کہیں مِرے غمخوار کے علاوہ بھی

کوئی تو بات کروں یار کے علاوہ بھی

بہت سے ایسے ستمگر تھے جو اب یاد نہیں

کسی حبیبِ دلآزار کے علاوہ بھی

یہ کیا کہ تم بھی سرِ راہ حال پوچھتے ہو

کبھی ملو ہمیں بازار کے علاوہ بھی

سو دیکھ کر تِرے رخسار و لب یقیں آیا

کہ پھول کھلتے ہیں گلزار کے علاوہ بھی

کبھی فرازؔ سے آ کر ملو جو وقت ملے

یہ شخص خوب ہے اشعار کے علاوہ بھی

احمد فراز