نظم کہو گے

(نظم گو کے لیے مشورہ)

نظم کہو گے
کہہ لو گے کیا؟
دیکھو اتنا سہل نہیں ہے
بنتی بات بگڑ جاتی ہے
اکثر نظم اکڑ جاتی ہے

٭٭٭٭
چلتے چلتے
 لا“ کو مرکز مان کے”
گھومنے لگ جاتی ہے
٭٭٭٭
لڑتے لڑتے
لفظوں کے ہاتھوں کو
چُومنے لگ جاتی ہے
٭٭٭٭
سیدھے رستے پر مُڑتی ہے
موڑ پہ سیدھا چل پڑتی ہے
٭٭٭٭
حرف کو برف بنا دیتی ہے
برف میں آگ لگا دیتی ہے
٭٭٭٭
چُپ کا قُفل لگا کر گُونگی ہو جاتی ہے
دِھیما دِھیما بولتے یکدم غرّاتی ہے
٭٭٭٭
نظم کہو گے
کہہ لو گے کیا؟
دیکھو اتنا سِہل نہیں ہے
بنتی بات بِگڑ جاتی ہے
راہ میں سانس اُکھڑ جاتی ہے

دانیال طریر