سلسلہ جنباں شام ہے کس کی، شکوہ کناں ہے کس کی شام

سلسلہ جنباں شام ہے کس کی، شکوہ کناں ہے کس کی شام
ہم تو گماں برباد ہی ٹھہرے، شامِ گماں ہے کس کی شام
اس میدانِ شکستِ جاں میں کون بچا زندہ جانے
کیا جانے اس شہرِ عبث میں کس کا زیاں ہے کس کی شام
آج کہاں کیسا موسم ہے، جسم و جان کی بستی میں
شبنم شبنم جسم ہے کس کا، شعلہ بجاں ہے کس کی شام
شام کا شہر بے پُرسش ہے اور بازاروں کا آشوب
پُرسشِ جاں! تیرے قریے میں شکوہ کناں ہے کس کی شام
گم ہوئی اپنی خوش گزرانی کوچۂ دل نا پُرساں میں
جانے دل کوچے میں ہمارے خوش گزراں ہے کس کی شام

جون ایلیا