ارض و سما سے پوچھ کہ میں ہوں کہاں کہاں

ارض و سما سے پوچھ کہ میں ہوں کہاں کہاں

جاگا ہے میری سوچ کا افسوں کہاں کہاں

آئینۂ شفق سے رخِ ماہتاب تک

ہے جنتِ نگاہ مِرا خوں کہاں کہاں

دھرتی پہ جابجا ہیں اجالے کے گھاؤ سے

مارا ہے ماہتاب نے شبخوں کہاں کہاں

ہر اک زمیں پہ ایک ہی تحریر نقش ہے

ملتا ہے ایک رنگ ما مضموں کہاں کہاں

بکھری پڑی ہیں دہر میں ذہنوں کی کرچیاں

ہر آئینے کے حال پہ سوچوں کہاں کہاں

ہر گوشۂ زمیں پہ اندھیروں کا راج ہے

میں اک شعاعِ مہر ہوں، چمکوں کہاں کہاں

ہر سو فرازِ دار پہ نوحہ کناں ہیں دوست

زلفیؔ میں دم بخود ہوں کہ دیکھوں کہاں کہاں

سیف زلفی