مرے کوچے میں وہ کن شوخیوں سے جا بجا ٹھہرے

مِرے کوچے میں وہ کن شوخیوں سے جا بجا ٹھہرے

بڑھے بڑھ کر تھمے دم بھر چلے چل کر ذرا ٹھہرے

تغافل کی نہ ٹھہرے آج قاتل فیصلہ ٹھہرے

نہیں تلوار تو فقرہ کوئی چلتا ہوا ٹھہرے

تسلی دل کو جو دیتے ہیں کیسے لوگ ہیں یا رب

جگر ہی جب نہ ٹھہرے تو جگر پر ہاتھ کیا ٹھہرے

مسیحؑ و خضرؑ گو یکتا ہیں دونوں ہم تو جب جانیں

جو دل گرتا ہوا سنبھلے، جو دم جاتا ہوا ٹھہرے

اڑا جاتا ہے مطلب کیا لکھوں میں خط میں اے قاصد

پریشانی ٹھہرنے دے تو دل میں مدعا ٹھہرے

بہارِ بے خزاں دیکھی ہے کب تُو نے دکھا دیں ہم

جو اس کی طبع میں اے باغباں رنگِ وفا ٹھہرے

گِلہ جور و ستم کا حشر میں، پھر عشق کا دعویٰ

مِرا ذمہ تِرے آگے جو کوئی بے خطا ٹھہرے

مِری افتادگی نے آسمان پر مجھ کو پہنچایا

زمین پر وہ نہ ٹھہرے جو تمہاری خاکِ پا ٹھہرے

وہی انسان پورا ہے اس کے ہم تو قائل ہیں

بھلوں میں جو بھلا ٹھہرے بروں میں جو برا ٹھہرے

مزا چکھا نہیں دنیا کا زاہد تُو نے دنیا میں

کبھی تو بادہ نوشی کی بھی اے مردِ خدا ٹھہرے

صبا تجھ کو تو غنچے چٹکیوں ہی میں اڑا دیتے

جو نکہت خود ہو آوارہ تو ٹھہرائے سے کیا ٹھہرے

ابھی سامان آہ و نالہ و فریاد پیچھے ہے

قدم آگے نہ رکھے عرشِ اعلیٰ پر دعا ٹھہرے

تِری آنکھیں ہیں اس نےتاک لیں اپنے ٹھہرنے کو

ٹھہرتی ہے اگر تو چشمِ دشمن میں حیا ٹھہرے

متاعِ شوق بھی ہے مایۂ الفت بھی رکھتے ہیں

اگر لیجیے تو کچھ سودا ہمارا آپ کا ٹھہرے

شبِ وعدہ جب ان سے شکوۂ تاخیر کرتا ہوں

تو کہتے ہیں کہ ہم انسان کیا ٹھہرے ہوا ٹھہرے

رہا روزِ جزا کے بعد کا غم مجھ کو حشر میں

کہ دن کو تو یہ ٹھہرے رات کو کیا جانے کیا ٹھہرے

قسم ہے اس کی یہ مرضی نہیں اے داورِ محشر

کہ مجرم داغؔ ٹھہرے اور دشمن بے خطا ٹھہرے

داغ دہلوی