وہ دل جو چلا بیعت ابرار میں آوے

سلام بحضور امامِ عالی مقام، بر زمینِ غالب

وہ دل جو چلا بیعتِ ابرار میں آوے

وہ کیسے کسی دامِ طرحدار میں آوے

لطف ایسا علی ذکرِ علمدار میں آوے

یوں جیسے کوئی دشت سے گلزار میں آوے

پانی نے کری عرض کہ اے شاہِ شہیداں

گر اِذن ہو بندے کو تو سرکار میں آوے؟

جاں بن کے دھواں، شامِ غریباں کا سہے غم

دل ہو کے لہو چشمِ عزادار میں آوے

منکر کو ہوا تک نہیں لگتی تِری حُب کی

مومن ہی ولا خانۂ انوار میں آوے

تجھ صبرِ ابد نور کی لو اس پہ پڑی ہے

آئینۂ دِیں کیوں کسی زنگار میں آوے

ہر قولِ نبیؐ اور ہر اک وصف علی کا

ہو ہو کے مکمل تِرے کردار میں آوے

وہ جس نے کیا حُر کو سرافرازِ زمانہ

مولا وہی خو پھر تِرے انصار میں آوے

جز تیرے ہے کون اس کا، سو یہ بندۂ بیکار

ہر پھر کے اسی بارگہِ یار میں آوے

مولائے جہاں عرض کروں کیا تِرے آگے

کچھ تجھ سے چھپا ہو تو وہ اظہار میں آوے

زریون ثنا خوانیٔ شبیر کئے جا

تا، جذبِ محبت تِرے اشعار میں آوے

علی زریون