اب تو اس طرح مری آنکھوں میں خواب آتے ہیں

اب تو اس طرح مِری آنکھوں میں خواب آتے ہیں

جس طرح آئینے چہروں کو ترس جاتے ہیں

احتیاط، اہلِ محبت کہ اسی شہر میں لوگ

گل بدست آتے ہیں اور پا بہ رسن جاتے ہیں

جیسے تجدید تعلق کی بھی رُت ہو کوئی

زخم بھرتے ہیں تو احباب بھی آ جاتے ہیں

ساقیا! تُو نے تو مۓ خانے کا یہ حال کیا

بادہ کش محتسبِ شہر کے گُن گاتے ہیں

طعنۂ نشہ نہ دو سب کو کہ کچھ سوختہ جاں

شدتِ تشنہ لبی سے بھی بہک جاتے ہیں

ہر کڑی رات کے بعد ایسی قیامت گزری

صبح کا ذکر بھی آئے تو لرز جاتے ہیں

احمد فراز