کیا کہوں کیا ملا ہے کیا نہ ملا

کیا کہوں کیا ملا ہے کیا نہ ملا

دل بھی شایانِ دلربا نہ ملا

تلخئ زندگی، ارے توبہ

زہر میں زہر کا مزا نہ ملا

ہم کو اپنی خبر نہ دامن کی

چشمِ رحمت کو اک بہانہ ملا

لاکھ ملنے کا ایک ملنا ہے

کہ ہمیں اذنِ التجا نہ ملا

فتنۂ رِند و محتسب توبہ

برملا کوئی پارسا نہ ملا

تھی بڑی بھیڑ اسکے کوچے میں

خضر آئے تھے راستا نہ ملا

کس سے ملئے روشؔ کہ دِلی میں

سب ملے، وہ خود آشنا نہ ملا

روش صدیقی