جز غم کوئی انعام وفا ہو تو کہیں بھی

جز غم کوئی انعامِ وفا ہو تو کہیں بھی

کچھ اس کے سوا ہم کو ملا ہو تو کہیں بھی

جینا ہے فقط جلتی ہوئی ریت پہ چلنا

اس راہ میں سائے کا پتا ہو تو کہیں بھی

ہر لمحہ بکھرتے ہیں، لٹے جاتے ہیں لیکن

کچھ اپنی تباہی کا گِلہ ہو تو کہیں بھی

لوٹ آئے ہیں خوابوں کے پراسرار وطن سے

باقی کہیں گھر کوئی بچا ہو تو کہیں بھی

ویسے ہی شب و روز، وہی غم، وہی خوشیاں

ہنگامہ نیا کوئی اٹھا ہو تو کہیں بھی

بشر نواز