نسیم ہے ترے کوچے میں اور صبا بھی ہے

نسیم ہے تِرے کوچے میں اور صبا بھی ہے

ہماری خاک سے ٹک دیکھ کچھ رہا بھی ہے

تِرا غرور، مِرا عجز، تا کجا ظالم

ہر ایک بات کی آخر انتہا بھی ہے

جلے ہے شمع سے پروانہ اور میں تجھ سے

کہیں ہے مہر بھی جگ میں کہیں وفا بھی ہے

خیال اپنے میں گو ہوں ترانہ سنجاں مست

کراہنے کو دلوں کے کبھی سنا بھی ہے

ستم روا ہے اسیروں پہ اس قدر صیاد

چمن چمن کہیں بلبل کی اب نوا بھی ہے

سمجھ کے رکھیو قدم دشتِ خار میں مجنوں

کہ اس نواح میں سودؔا برہنہ پا بھی ہے

مرزا رفیع سودا