رات یاد نگہ یار نے سونے نہ دیا

 رات یادِ نگہِ یار نے سونے نہ دیا

شادئ وعدۂ دلدار نے سونے نہ دیا

ہو گئی صبح در خانہ پہ بیٹھے بیٹھے

فتنۂ چشم فسوں کار نے سونے نہ دیا

شب وہ بیکل رہے کاکل میں پھنسا کر اس کو

شور و فریاد دلِ زار نے سونے نہ دیا

تھا شبِ ہجر میں اک خون کا دریا جاری

ایک پَل دیدۂ خوں بار نے سونے نہ دیا

اس تن زار پہ ایک بار گراں ہے یہ بھی

یار کے سایۂ دیوار نے سونے نہ دیا

اب تو کر دیویں رہا وہ مجھے شاید کہ انہیں

میری زنجیر کی جھنکار نے سونے نہ دیا

رات بھر خون جگر ہم نے کیا ہے عارف

فکر رنگینیٔ اشعار نے سونے نہ دیا

زین العابدین عارف