زندگی ایک سر میں جی لی تھی

 زندگی ایک سُر میں جی لی تھی

یار وہ لڑکی کیا سُریلی تھی

کیا اسی وقت تن کے بیٹھنا تھا

جب مقدر کی کھاٹ ڈھیلی تھی

جب تِرے پاس ایک جنگل تھا

تب مِرے پاس ایک تِیلی تھی

یہ کسی لمس کی بدولت تھا

آج چائے بہت نشیلی تھی

خواب بونے ہیں، خواب بوئے تھے

آنکھ گیلی ہے، آنکھ گیلی تھی

ہے تِرے بعد مختصر قصہ

زندگی جی نہیں تھی، جھیلی تھی

وہ کسی ہونٹ کی بھری چھاگل

کتنی میٹھی تھی، کیا رسیلی تھی

تیرے ملنے سے پیشتر افسوس

زندگی جینے والی جی لی تھی

مسعود ساگر