کسی موج نے ڈبویا، کسی موج نے ابھارا​

کسی موج نے ڈبویا، کسی موج نے اُبھارا​

اسی کشمکش میں آخر مجھے مل گیا کنارا​

نہ سرِشکِ شمعِ محفل نہ بجھا بجھا شرارا​

وہ چراغِ آرزو ہوں جو نہ جل سکا دوبارا​

ہوا نذر تِیرہ بختی، شبِ غم کا ہر سہارا​

نہ پلک پہ کوئی آنسو، نہ فلک پہ کوئی تارا​

مِری آرزو کا حاصل مِری زیست کا سہارا​

وہی لمحہ زندگی کا، تِرے ساتھ جو گزارا​

مجھے دل کی دھڑکنوں پہ ہوا بارہا یہ دھوکہ​

کہیں پاس ہی سے جیسے مجھے آپ نے پکارا​

تِری یاد بھی ستمگر، تِری ہم خیال نکلی​

کبھی بن گئی سہارا، کبھی کر گئی کنارا​

کہیں شورشِ جنوں ہے کہیں موجۂ سکوں ہے​

یہی زندگی تلاطم، یہی زندگی کنارا​

سرِ کوہِ طورِ موسیٰ جسے دیکھ کر ہوئے غش ​

کوئی آپ سے یہ پوچھے وہ نظر تھی یا نظارا​

کبھی میرے آنسوؤں کی سنی التجا نہ تم نے​

مِری بے زبانیوں نے تمہیں بارہا پکارا​

یہ عجیب ماجرا ہے مِرے غم نصیب دل کا ​

کہ جو موج لے کے ڈوبی وہی بن گئی کنارا​

​

حزیں صدیقی​