خود ہی رستے میں چن کے خار مرے

 خود ہی رستے میں چُن کے خار مِرے

اب نہ کر آبلے شمار مرے

اپنے کاجل کے ایک نقطے سے

بیٹھ کے زائچے سنوار مرے

ہے محبت کو ہجر بھی درکار

اے حبیبِ وفا شعار مرے

تیری موہوم سی ہنسی مونس

اور دکھ درد بے شمار مرے

میرے چہرے سے دھوکہ مت کھانا

ارد گرد آئینے ہزار مرے

میں کہیں پیار نہ سمجھ بیٹھوں

نام الٹے نہ یوں پکار مرے

قہقہے، اشک، خواب کچھ شکوے

ہیں تمہاری طرف ادھار مرے

ہے تِرا انتظار کس درجہ

بے قراری سے، اے قرار مرے

میں بھلا کیوں خزاں سے دھوکہ کروں

لوٹ جا قاصدِ بہار مرے

اکرام اعظم