آگ سے آگ بجھانے کا ہُنر سیکھ لیا
زخم نے درد چھُپانے کا ہنر سیکھ لیا
اور کیا سیکھتے اے قافلۂ خُوش گُزراں
گرد اپنی ہی اُڑانے کا ہنر سیکھ لیا
تیز کر دی گئی رفتار ہماری بھی، مگر
ہم نے آنے کا نہ جانے کا ہنر سیکھ لیا
کون ہم گوشہ نشینوں سے کرے گفت و شنید
ہم نے سننے نہ سنانے کا ہنر سیکھ لیا
بعد کھونے کے ہے پانے کا مزہ خوب مگر
ہم نے کھونے کا نہ پانے کا ہنر سیکھ لیا
ہم نے اس شہرِ عجائب کے دبستانوں سے
پردۂ غیب اٹھانے کا ہنر سیکھ لیا
خوفِ شمشیر تھا یا گرمئ پہلوے بُتاں
جاگنے کا نہ جگانے کا ہنر سیکھ لیا
صاحبو! دشمنوں نے معتمدوں سے میرے
دودھ میں زہر ملانے کا ہنر سیکھ لیا
خون آنکھوں سے مِری بہنے لگا جب میں نے
ناؤ کاغذ کی بنانے کا ہنر سیکھ لیا
شفق سوپوری
No comments:
Post a Comment