دیکھیے تو وہ نظر آتے ہیں شاہانہ مزاج

دیکھیے تو وہ نظر آتے ہیں شاہانہ مزاج

جانچیے تو ان کا باطن ہے فقیرانہ مزاج

جامعِ اضداد ہوتے ہیں ہمیشہ اہلِ دل

ہوش میں رہتے ہوئے رہتے ہیں دیوانہ مزاج

پڑتی ہے شانِ کریمیﷻ کی تجلّی مستقل

جب ہی اہل اللہ رکھتے ہیں کریمانہ مزاج

کرتے ہیں فقہی مسائل حل مثالِ عشق سے

یوں جھلکتا ہے کبھی ان کا فقیہانہ مزاج

ساقئ دوراں کا بس اک جام کافی ہے جناب

جو یہاں آئے بدل جاتا ہے رندانہ مزاج

جانِ جاناں پر فدا ہونے کو ہر دم جاں بدست

شمعِ حق کے لیے رکھتے ہیں پروانہ مزاج

طائرِ قُدسی کی صُحبت کا یہ ادنیٰ فیض ہے

ہو گئے رشکِ مَلک اکثر بہیمانہ مزاج

یہ نگاہِ شیخ کی زندہ کرامت ہے اثر

دیکھتے ہی دیکھتے یکسر بدل جانا مزاج

اثر جونپوری

شاہین اقبال اثر