جو خوش نصیب حضوری میں جا نکلتا ہے

 جو خوش نصیب حضوری میں جا نکلتا ہے

لبوں سے نغمۂ صلِ علیٰ نکلتا ہے

محبتوں کا عجب شہر ہے مدینہ بھی

ہر ایک شخص جہاں آشنا نکلتا ہے

حرم میں ہوتا ہے ایسا گداز کا عالم

جہاں پہ اشک برنگِ دعا نکلتا ہے

طلسم خانۂ قدرت ہے شہرِ محبوبی

ہر ایک گام پر منظر نیا نکلتا ہے

نگاہِ شوق کو ملتا ہے اذنِ گویائی

خموشیوں میں بھی اک مُدعا نکلتا ہے

اسی زمینِ مقدس سے سارے عالم میں

کرم کا، جُود کا، اک سلسلہ نکلتا ہے

بکھیر دیتا ہے قرطاس پر گُہر پارے

قلم سے جب مِرے حرفِ ثنا نکلتا ہے

حافظ لدھیانوی