اچھا برا تھا وقت جو تحریر کر لیا

 اچھا بُرا تھا وقت جو تحریر کر لیا

چاہا تو پھر غزل میں بھی تصویر کر لیا

وہ دلنشین چل رہی تھی تمکنت کے ساتھ

دیکھا مجھے تو چال کو تغیِیر کر لیا

نظروں کے تیر میں تھے وہ ابرو کمان کش

چپ چاپ میں نے دل بہ ہدف تیر کر لیا

کہنے لگی کہ چاند بھی جھومر ہے عرش کا

میں نے کہا کہ شعر میں تحریر کر لیا

میں نے کہا کہ ساتھ ہو اور عمر بھر کا ہو

پھر اُس نے وعدہ عمر کی زنجیر کر لیا

بڑھ کر گلے لگا لیا تھا میں نے شوخ کو

پھر لمحہ نازنیں نے وہ تصویر کر لیا

سانسوں کے ساتھ دھڑکنیں بھی تیز تیز تھیں

اور بے خودی نے پھر ہمیں تسخیر کر لیا

کیف و سرور چھا گیا جو تن کی آنچ سے

ہاتھوں میں اس نے ہاتھ کو زنجیر کر لیا

آتا ہے اب خیال کہ بیٹھے بٹھائے کیوں

دونوں نے گھر یہ ریت کا تعمیر کر لیا

شہرِ سخن نے پھر کیا لہجہ مجھے عطا

جب یاد شعر داغ و جگر میر کر لیا

اکرام دلبر ایک ہے اپنا جہان میں

جس کی ادا نے قلب و جگر چیر کر لیا

اکرام قاسمی