لکھا ہے کہ تھی حضرت شبیر کو عادت

عارفانہ کلام منقبت سلام

 لکھا ہے کہ تھی حضرتِ شبیرؑ کو عادت

ہوتی تھی نمازِ سحری سے جو فراغت

پہلے علی اکبرؑ ہی کو بلواتے تھے حضرت

فرماتے تھے کرتا ہوں عبادت میں عبادت

روشن ہو نہ کیوں چشم حسینؑ ابن علیؑ کی

کرتا ہوں زیارت میں جمالِ نبویﷺ کی

کرتے علی اکبرؑ تو جھکا فرق کو مجرا

ہر مرتبہ مل جاتا تھا پاؤں سے سر ان کا

تعظیم کو ہوتے تھے کھڑے سیدؑ والا

کہتے علی اکبرؑ کہ یہ کیا کرتے ہو بابا

شہ کہتے تھے عادت تھی یہ محبوب خدا کی

تعظیم وہ کرتے تھے بتولِؑ عذرا کی

میر ضمیر