کہ شام ہوتے ترے خواب ڈھونے لگتے ہیں

 کہ شام ہوتے تِرے خواب ڈھونے لگتے ہیں

یہاں کے لوگ بہت جلد سونے لگتے ہیں

وہ بچپنے کی لُکن میٹی یاد آتی ہے

مجھے تو اچھے تِرے گھر کے کونے لگتے ہیں

ابھی جو پڑھ کے کوئی پھونکے چین آ جائے

جو چند نام ہمیں جادو ٹونے لگتے ہیں

ہمارے گاؤں میں ساری تمہاری برکت ہے

تمہارے ہونے سے سب کام ہونے لگتے ہیں

ابھی پہاڑ سے دیکھا تو یہ کھلا مجھ پر

کہ آسمان کو ہم کیوں کھلونے لگتے ہیں

عجیب دوست ہیں یہ، رشتہ دار جیسے دوست

ملیں نہ کانٹے تو باتیں چبھونے لگتے ہیں

یہ لوگ ہجر پہ ایمان لاچکے ہیں عطا

جبھی تو وصل کے موسم میں رونے لگتے ہیں

احمد عطاءاللہ