خود پسند اوج کے زینے سے اتر جاتا ہے

 خود پسند اوج کے زینے سے اُتر جاتا ہے

یہ وہ نشہ ہے جو پینے سے اتر جاتا ہے

رُخِ مزدور پہ کیا گرد کا غازہ ٹھہرے

یہ تو محنت کے پسینے سے اتر جاتا ہے

لاکھ میں بند کروں آنکھ کے دروازوں کو

دل میں وہ پھر بھی قرینے سے اتر جاتا ہے

تیرے انکار کو سنتے ہی میں اٹھ بیٹھا ہوں

جیسے اک بوجھ سا سینے سے اتر جاتا ہے

موج اس دُکھ میں کنارے کو دھکیلے ہے پرے

کیوں یہاں کوئی سفینے سے اتر جاتا ہے

ہے تِرا نام وہ منتر کہ جسے پڑھتے ہی

سانپ فوراً ہی دفینے سے اتر جاتا ہے

موت رُکتی نہیں ذیشان، مگر موت کا خوف

دوسروں کے لیے جینے سے اتر جاتا ہے

ذیشان اطہر