چاند کا رقص ستاروں کا فسوں مانگتی ہے

 چاند کا رقص ستاروں کا فسوں مانگتی ہے

زندگی پھر کوئی اندازِ جنوں مانگتی ہے

مدتیں گزریں کہ یخ بستہ ہوئے قلب و جگر

غیرتِ عشق مگر سوزِ دروں مانگتی ہے

فیضِ موسم تھا پرندے ہوئے آزاد مگر

خوئے صیاد وہی صیدِ زبوں مانگتی ہے

فصلِ گل کے لیے کیا جان پہ کھیلے کوئی

اب تو ہر موجِ ہوا تحفۂ خوں مانگتی ہے

کچھ تو اے یورشِ آلام و حوادث دم لے

گردش وقت بھی تھوڑا سا سکوں مانگتی ہے

خوبیٔ فن نہیں پروردۂ آوردِ سحر

روحِ تخلیق دمِ کُن فیکوں مانگتی ہے

ابو محمد سحر