بتاؤ کیا حال ہو گا

 جب مدتوں بعد

تم اپنا فیس بک اکاؤنٹ کھولو گے

اپنی پرانی پوسٹوں پر

میرے لائیکس اور کمنٹ دیکھو گے

لیکن مجھے نہ پاؤ گے

تو بتاؤ کیا حال ہو گا شدتِ غم سے

ایک آنسو ضبط کی سرحد کو توڑ کر

خشک ہونٹوں میں جذب ہو جائے گا نا

جب میری ویران اور 

اک عرصے سے خاموش وال پر جاؤ گے

ون ڈے اگو کے بجائے

ایک طویل وقت کا سکوت دیکھو گے

تو بتاؤ کیا حال ہو گا

دل سے اٹھتی درد کی ٹیسیں 

آہ کی شکل میں منہ سے نکلیں گی نا

جب شئیر شدہ

میری چاہتوں سے بھری

محبتیں برسانے والی

پیار بھری پوسٹیں

دیکھو گے

تو بتاؤ کیا حال ہو گا

یادوں کی انگلی پکڑ کر

ماضی کے اک جزیرے میں آ بسو گے نا

جب کسی اور کی پوسٹ پر

میرے کمنٹ سامنے سے گزریں گے

تو بتاؤ کیا حال ہو گا

حسد کی آگ اور اپنائیت کی جلن میں اس دن بھی جلو گے نا

بتاؤ اس دن کیا حال ہو گا

جب میرے بِن

فیس بک تمہیں پھیکی پھیکی سی لگے گی

جب تمہیں لاگ ان ہوتے ہی

چاروں طرف اجنبیت

بیگانگیت

اور بوریت نظر آئے گی

جب کچھ پوسٹ کرنے کو دل نہیں چاہے گا

کچھ پڑھنے کو من نہیں مانے گا

تو ندامت کی عینک لگا کر

معافی کی سڑک پر پیچھے کو مڑو گے نا 

ہمیں

ہر نگر

ہمیں ہر گلی

ڈھونڈو گے نا

لیکن ہم نہیں ہوں گے

نہ ہم ملیں گے

نہ ہم پلٹیں گے

ہم تو اپنے خوابوں کی طرح

کہیں دفن ہو چکے ہوں گے

اپنی آرزؤں کی طرح

کہیں اڑ چکے ہوں گے

ہم کو پلٹ کے دیکھنا

مشکل سا ہو گیا

شاید تیری صداؤں سے بہت دور نکل گئے ہم

بدر نوید