بھیس بدلا ہے زباں اور مکاں بدلا ہے

بھیس بدلا ہے، زباں اور مکاں بدلا ہے

جو بدلنا تھا اسے تُو نے کہاں بدلا ہے

تیر بدلا ہے نہ ہی تُو نے کماں ہی بدلی

بس دکھاوے کے لیے اپنا نشاں بدلا ہے

چاند سورج یہ ہوا یا کہ زمیں کی گردش

بول کیا کیا تِرے آنے سے یہاں بدلا ہے

بس تجھے خود کو بدلنا ہی نہیں راس آیا

دور بدلا ہے زماں اور جہاں بدلا ہے

میٹھے خوابوں سے ہمیں کون اٹھا لے آیا

شیرخواری سے بڑھاپے میں زماں بدلا ہے

وعظ سے تیرے نصیحت کوئی پکڑا دانش

شکل بدلی ہے کسی کی نہ نہاں بدلا ہے

ایوب بیگ دانش