میں ڈر رہا ہوں اسے گھر یہ بیچنا نہ پڑے

 میں ڈر رہا ہوں اسے گھر یہ بیچنا نہ پڑے

یہ سارا ملبہ مجھے ہی سنبھالنا نہ پڑے

اضافی جان کے رکھ لے تُو اپنے پاس مجھے

کوئی نہ ہو تو تجھے مجھ کو ڈھونڈنا نہ پڑے

کچھ اس لیے میں تمہارا خیال رکھتا ہوں

پرائی چیز کو حسرت سے دیکھنا نہ پڑے

میں سوچتا ہوں بچھڑتے سمے لڑائی ہو

میں چاہتا ہوں مقدر کو کوسنا نہ پڑے

یقین کیسے دلاؤں میں خوش ہوں اس کے بغیر

پھر اس کے بعد مجھے جھوٹ بولنا نہ پڑے

نیا شریکِ سفر بھا گیا تو ڈر ہے مجھے

اداسیوں کو کہیں اور بھیجنا نہ پڑے

صداقت نیازی