عرض احوال دل زار کروں یا نہ کروں

 عرضِ احوالِ دلِ زار کروں یا نہ کروں؟

عشق سے اپنے خبردار کروں یا نہ کروں

گوشِ دل سے کبھی وہ حال سنے یا نہ سنے

وا میں اپنے لبِ گُفتار کروں یا نہ کروں

بوسہ اک اس سے جو مانگا تو لگا کہنے نہیں

ہے شش و پنج؛ کہ تکرار کروں یا نہ کروں

کہیے اے حضرتِ دل کیا ہے صلاحِ دولت

یار سے شکوۂ دیدار کروں یا نہ کروں

پھول آگے نہ مِرے توڑ ذرا اے گلچیں

کہہ تو سیر گل و گلزار کروں یا نہ کروں

شعور بلگرامی