مِری دستارِ عِفت قصرِ سلطانی نہ جائے گی
مِرے عزمِ مصمّم کی یہ تابانی نہ جائے گی
چلو بچنے کا ہم کوئی نہ کوئی راستہ ڈھونڈیں
ہوا اب کے برس اے دوست طوفانی نہ جائے گی
یقیناً سر جھکا سکتے نہیں ہم ظلم کے آگے
یہاں بیٹھے ہوئے لیکن پریشانی نہ جائے گی
تمہیں خود ہی سنبھل کر ہر قدم چلنا پڑے گا اب
غلاظت ڈالنے والوں کی من مانی نہ جائے گی
شبِ ہجراں سے کہہ دو اور کچھ سنگین ہو جائے
مِری بے تاب ان آنکھوں کی طغیانی نہ جائے گی
اگر آتے رہے احباب میرے سب سدا یوں ہی
کبھی بزمِ سخن کی دوست تابانی نہ جائے گی
اگر ظلم و ستم کی آندھیاں چلتی رہیں یوں ہی
مرے اپنوں سے میری شکل پہچانی نہ جائے گی
مرے گھر میں ہے دولت بھائی چارے کی ابھی صوفی
مرے گھر سے کبھی ان کی فراوانی نہ جائے گی
صوفی بستوی
No comments:
Post a Comment