مری غزل نے زمانے کو سوگوار کیا

 مِری غزل نے زمانے کو سوگوار کِیا

دلوں کو موم تو آنکھوں کو اشکبار کیا

کچھ اس طرح سے غموں کی گرِفت میں ہوں میں

کہ اک نے چھوڑا تو اک اور نے حصار کیا

تمام عمر اسی رہگزر پہ بیٹھا رہا

تمام عمر صنم تیرا انتظار کیا

اگرچہ تم نہیں آئے تمام رات، مگر

نظر بہکتی رہی، دل نے اعتبار کیا

ان آنسوؤں کا بُرا ہو کہ جو خفی تھا بہت

وہ راز سارے زمانے پہ آشکار کیا

جو من پسند ہے دل میں بسا لیا اس کو

یہ جُرم ہے تو سُنو! ہم نے بار بار کیا

تِری نگاہ کسی مےکدے سے کم تو نہیں

پِلا پِلا کے مجھے اس نے بادہ خوار کیا

تمہاری یاد نے تنہائیوں کے جُھرمٹ میں

تمام رات ہی حیدر کو بے قرار کیا

فرقان حیدر