خودنمائی سے غرض اور نہ مشہوری سے

 خودنمائی سے غرض اور نہ مشہوری سے

ہم تو اب شعر بھی کہتے ہیں تو مجبوری سے

چشمِ آہو پہ وہ کرتا ہے قصیدہ گوئی

جس کا مطلب ہو فقط ناف کی کستوری سے

داستاں غیرتِ پنجاب کی ہے، ورنہ غرض

کس کو مکھّو سے ہے جٹ مولا سے نت نوری سے

اس کی آنکھوں سے جنوں جھانک رہا تھا اب بھی

شخص جو رہ میں مِرا پاؤں کی معذوری سے

اب میسّر تو نہیں آپ کی قربت، لیکن

پھر بھی ہم دیکھ ہی لیتے ہیں زرا دوری سے

تُو مجھے حور کے قصّے میں نہ اُلجھا واعظ

ایک خاکی کو ہے نسبت بھلا کیا نوری سے

تیرے لہجے سے نمایاں ہے کہ مانوس ہے تُو

سورٹھ و بھیم سے کلیان سے مادھوری سے

میرے ہاتھوں نے بڑھاپے کا بھرم رکھا ہے

پل گئے ہیں مِرے بچے مِری مزدوری سے

ہائے، ہم خانہ بدوشوں کا مقدر آغا

لوگ تکتے ہیں گزر جاتے ہیں مغروری سے

جاوید آغا