محفل کہاں جو رونق محفل نہیں ہوں میں

 شکوہ

محفل کہاں جو رونقِ محفل نہیں ہوں میں

کیا مستئ شبانہ کا حاصل نہیں ہوں میں

آئینۂ شکستۂ ماضی بغل میں ہے

آرائشِ جمال سے غافل نہیں ہوں میں

نگراں ضمیرِ غیر کی ہے چشمِ عیب بیں

ثابت ہوا کہ ظالم و جاہل نہیں ہوں میں

ہنس لیتا ہوں کہ دل ہے مِرا تلخیوں سے پُر

تیرے حضور رونے پہ مائل نہیں ہوں میں

سینہ میں اک جہانِ شکایت ہے مثلِ نے

لیکن تِرے نفس کے مقابل نہیں ہوں میں

جل جاؤں میں بھی اور یہ سب کھیل بھی تِرا

ہیہات، اس شرار کا حامل نہیں ہوں میں

اب غیر کی عنایتِ پیہم کے ہوں سپرد

یعنی تِرے غضب کے بھی قابل نہیں ہوں میں

رنگینئ فنا ہے مِری علتِ وجود

نقاشِ منتقِم! خطِ باطل نہیں ہوں میں

اِک طعن بے محل ہے تِرا وعدۂ نشور

جب اپنی زندگی کا بھی قائل نہیں ہوں میں

اک ذرۂ حقیر ہوں اے ربِ کائنات

دنیا کے ہر گناہ کا حامل نہیں ہوں میں

اِک لمحۂ حیات کی ہے دل میں آرزو

تیری بقا سے اس کا بھی سائل نہیں ہوں میں

اے ارض، اے فلک، یہ عجب انتقام ہے

جینا محال، اور نہ جینا حرام ہے

کرار حسین