عارفانہ کلام حمد نعت منقبت
جب تک تِرے روضے پہ نظر رکھے رہیں گے
ہم دیکھتے رہنے کا ہنر رکھے رہیں گے
وہ کربل و کوفہ ہوں، مدینہ ہو حرم ہو
سرکارؐ جدھر چاہیں ادھر رکھے رہیں گے
ہم پڑھتے رہیں گے تِراﷺ پیغامِ محبت
صفحوں میں یونہی مور کے پر رکھے رہیں گے
راہوں میں تِریﷺ نور کا پیمان رہے گا
قدموں میں تِرے شمس و قمر رکھے رہیں گے
یہ لوگ تِرے چاہنے والے شہِ لولاکﷺ
یہ لوگ زمانوں سے ادھر رکھے رہیں گے
دنیا میں بھی وہ خیر خبر رکھے ہوئے ہیں
محشر میں بھی وہ ہم پہ نظر رکھے رہیں گے
اک روز پہنچ جائیں گے تجھ در پہ یقیناً
آنکھوں پہ تِری راہگزر رکھے رہیں گے
آزر مِرے آقاؐ ہوئے تخلیق کا موجب
آفاق اسی دہلیز پہ سر رکھے رہیں گے
دلاور علی آزر
No comments:
Post a Comment