کیا وار جب اس نے تیر نظر سے

 کِیا وار جب اس نے تیرِ نظر سے 

اک اک رِند بولا اِدھر سے اِدھر سے

جو پوچھا کہ تم تھے کہاں رات بھر سے

پڑی کھینچ کر دو، اِدھر سے اُدھر سے

برآمد ہوئے ہو رقیبوں کے گھر سے

کدھر کے تھے تم اور مِلے ہو کدھر سے

گزر کر رہا تیر میرے جگر سے

لگایا نشانہ انہوں نے جدھر سے

ذرا بیٹھیۓ فاصلہ رکھ کر صاحب

کہیں جُڑ نہ جائے کمر بھی کمر سے

خدا جانے کیا لکھ دیا ہم نے خط میں

محبت انہیں جو ہو گئی نامہ بر سے

وہ بسمل کا درجہ تو دیں مجھ کو یا رب

جبیں رنگ لوں گا میں خونِ جگر سے

پلٹ کر جو دیکھا تو شرما کے بولے

نظر لگ نہ جائے ہمیں اس نظر سے

شبِ وصل ان کی وہ سرمستی توبہ

لیے بوسے ہم نے اِدھر سے اُدھر سے

نگاہیں نہ پھیرو، عبارت نہ پلٹو

بتاؤ ملا ہے نیا دل کدھر سے

پسینہ نہ ایسے وگرنہ ٹپکتا

کسی کا تو یارانہ ہے اس کمر سے

سمے لے لیا ہے، سکوں لے لیا ہے

بلائیں بھی لے لے کوئی میرے سر سے

مزا ہو جو تیرِ نظر وہ چلائیں

تڑپ کر کہوں میں؛ اِدھر سے اِدھر سے

اسی رہگزر پر مِلی خاک اپنی

گزرتا ہے جبریل جس رہگزر سے 

درود اس دِوانے کی قسمت پہ حمزہ

جسے موت آ جائے تِرچھی نظر سے

حمزہ عمران