اے رحمت تمام ترے اسم پاک سے

 عارفانہ کلام حمد نعت مقبت

اے رحمتِ تمام! تِرےؐ اسم پاک سے

ڈھارس بندھی، یقیں ملا، معجزے ہوئے

تُو ربِ کائنات، تمنائے انس و جاں

میں مشتِ خاک، ذرۂ نا چیز بے گُماں

اس پیکرِ حقیر کو اے حُسنِ لا یزال

عجز و گدازِ روح کی بخشی گئی مجال

تِری اطاعتوں کا قرینہ جمالِ جاں

تِری محبتوں کا خزینہ کمالِ جاں

جود و سخا و مرحمتِ دل پذیر ہے

کیا عرض کر سکوں کہ علیم و بصیر ہے

نومیدیوں کے دشت میں جب بھی ہوئی ہوں گم

آئی ندائے لطف؛ کہ تنہا نہیں ہو تم

غنچے کی آرزو کو گُلستاں عطا کیا

قطرے کی جستجو کو یم بے کراں دیا

جو تیری  بارگاہ کے قابل ہو وہ جبیں 

آقائے دو جہاںؐ تِری نعمت ہے بالیقیں

تِرے حضور سجدۂ عرضِ وفا کروں

میں کس طرح نمازِ تشکر ادا کروں 

ادا جعفری