یہ میرے ہاتھ کی گرمی
یہ میرے ہاتھ کی گرمی
جسے چُھو کر
تمہاری آنکھ میں حیرت کے ڈورے ہیں
کہ اس سے قبل جب بھی تم نے میرا ہاتھ تھاما
برف کا موسم ہی پایا
یہ موسم میرے اندر کتنے برسوں سے فروکش تھا
بہار آئی تھی
اور میرے دریچوں پر کبھی دستک نہ دیتی تھی
گلابی بارشیں
میرے لیے ممنوع تھیں
اور صبح کی تازہ ہوا کا ذائقہ
میں بُھول بیٹھی تھی
مِرے ملبوس سے سب گرم رنگوں کو شکایت تھی
مگر جاناں
تمہارے ساتھ نے تو رُوح کا موسم بدل ڈالا
یہاں اب رنگ کا تہوار ہے
خوشبو کا میلہ ہے
مِرا ملبوس اب گہرا گلابی ہے
مِرے خوابوں کا چہرہ ماہتابی ہے
مِرے ہاتھوں کی حدت آفتابی ہے
جسے چُھو کر ۔۔۔
پروین شاکر
No comments:
Post a Comment