رمز الفت جو گرفتار سمجھ لیتے ہیں

 رمزِ اُلفت جو گرفتار سمجھ لیتے ہیں

اپنے سائے کو بھی دیوار سمجھ لیتے ہیں

دیکھ جا چشمِ تبسم سے کہ بیمار تِرے

تیری مُسکان کو غمخوار سمجھ لیتے ہیں

خود میں ساحر ہے مِری سادہ دلی کہ مجھ کو

جتنے ہُشیار ہیں، فنکار سمجھ لیتے ہیں

کون سی آنکھ کی کس نظر کے کیا معنی ہیں

ہم سمجھ لیتے ہیں، سرکار! سمجھ لیتے ہیں

ہم وہ درویش طبیعت سے ہیں عاشق، تجھ کو

دیکھ لینے کو ہی دیدار سمجھ لیتے ہیں

ہم محبت کے تو بچپن سے ہیں بُھوکے سانول

جس نے بھی یار کہا یار، سمجھ لیتے ہیں

سانول حیدری