زخم کھا کر بھی مسکرانا ہے

 زخم کھا کر بھی مُسکرانا ہے

دوست دُشمن کو آزمانا ہے

وہ کہاں اور التفات کہاں؟

دل دُکھانے کا اک بہانہ ہے

جانتا ہوں حقیقتِ ہستی

جان کر بھی فریب کھانا ہے

ڈُھونڈتی پِھر رہی ہے برقِ ستم

چند تنکوں کا آشیانہ ہے

فکرِ دُنیا میں گُھل رہے ہیں لوگ

چار دن کا یہ آب و دانہ ہے

کچھ نہیں سیر مےکدہ سے غرض

زیست کرنے کا اک بہانہ ہے

غم سے احمد نجات کیوں کر ہو

اس سے رشتہ بہت پُرانا ہے

الطاف احمد اعظمی