لکھنے کو میرے دل میں تو ارمان نعت ہے

 عارفانہ کلام حمد نعت منقبت

لِکھنے کو میرے دل میں تو ارمانِ نعت ہے

اک پُھول کیا چُنوں کہ گُلستانِ نعت ہے

ہر لمحۂ حیات کی بس جان نعت ہے

"ہر شعبۂ حیات میں امکانِ نعت ہے "

جب تک نہ دل میں چاہت سرکار دینؐ ہو

کیسے لکھے کوئی کہ یہ شایانِ نعت ہے

جب سے خیال ڈھل گئے اشعار میں مِرے

ہر سانس میں بسا ہُوا عنوانِ نعت ہے

میرے خیال و فکر میں پیوست ہو گئی

ہر ایک لمحہ اور ہر اک آن نعت ہے

قرآن میں بھی ذکر کا مرکز نبیؐ ہی ہیں

گویا ظہور ہستی میں اعلان نعت ہے

مِدحت کی روشنی سے جو لفظوں کو بھر دیا

جو کچھ ملا نگار یہ فیضانِ نعت ہے

نگار سلطانہ