رکھے معبود نے بخشش کے بہانے کتنے

 عارفانہ کلام حمد نعت منقبت

رکھے معبود نے بخشش کے بہانے کتنے

نعت لے جائے گی جنت میں نہ جانے کتنے

جھاڑ دیں سیدِ لولاکﷺ تو پا جائیں وجود

گردِ نعلینِ پیمبرﷺ سے زمانے کتنے

لا نہ پایا کوئی بھی سورۂ کوثر کا جواب

اہلِ مکہ نے گھڑے جُھوٹے فسانے کتنے

آپؐ جُھولے میں ہیں، جبرئیلؑ ذرا گِن کے بتا

پائنتی کتنے پیمبرؑ ہیں، سرہانے کتنے

پال دے میرا نبیؐ، نعت سکھا دے سب کو

کام سونپے ابو طالبؑ کو خدا نے کتنے

یہ تو بس گُنبدِ خضریٰ کے ستوں جانتے ہیں

دیپ آ آ کے جلائے ہیں ہوا نے کتنے

یا الہیٰ یہ بتا لوگ نبیﷺ کے عاشق

کتنے کعبے نے کیے کرب و بلا نے کتنے

ذکرِ سرکارِﷺ دو عالم کے کرم سے اکبر

معتبر ہو گئے ناچیز گھرانے کتنے

حسنین اکبر