حیات مختصر اور کام کیا کیا

 حیاتِ مختصر اور کام کیا کیا

اور اس پر ذہن میں اوہام کیا کیا

بُرا ہو اے خلوصِ نیّتِ دل

تِری خاطر ہوئے بدنام کیا کیا

ہٹے مسلک سے ہم ہرگز نہ اپنے

اگرچہ لگ گئے الزام کیا کیا

نجانے شب میں کیا گزرے گی دل پر

لیے آئی ہے صدمے شام کیا کیا

سبھی کی ایک ہی منزل تھی لیکن

ملے ہیں جستجو کو نام کیا کیا

تشدد، غم، بلائے ناگہانی

تِرے رُخ گردشِ ایام کیا کیا

ہے ضبط اچھا مگر کوئی تو حد ہو

سہے گا اک دلِ ناکام کیا کیا

ملک تاسے