جب کوئی ہم سے دور ہو جاتا ہے

شاید یہی بہتر ہو

جب کوئی ہم سے دور ہو جاتا ہے

تو ہم اسے بھول جاتے ہیں

اس کی جگہ

ایک خدا تخلیق کر لیتے ہیں

یادوں کے مندر میں

ایک مورتی کھڑی کر دیتے ہیں

پھر اس کی پوجا کرنے لگتے ہیں

اور بھول جاتے ہیں

کہ کبھی یہ بھگوان

انسان بھی تھا

میں نے بھی تمہارے ساتھ

یہی کیا ہے

اگر تم کبھی مجھے واپس مل گئے

تو میرے خواب

اور میں خود

پارہ پارہ ہو جائیں گے

شاید

یہی بہتر ہو

کہ تم مجھے

کبھی نہ مل سکو

محمد اویس خاں