دلوں کو نور ملا اک ترے اشارے پر

 عارفانہ کلام حمد نعت منقبت

دِلوں کو نُور مِلا اِک تِرے اشارے پر

الف کھلا ہے تِرے مِیم کے سہارے پر

اسے شعور کی دولت ملی تِرے در سے

یہ زندگی کہ جو نازاں تھی ہر خسارے پر

بنامِ ہجرِ مدینہ ہمارے اشک سبھی

ہمارے خواب ہیں موقوف اک نظارے پر

فراتِ خواہشِ دل درمیان پڑتا ہے

وہ سبز خواب ادھر ہیں، میں اس کنارے پر

یہاں سے آگے کوئی ساتھ جا نہیں سکتا

مقام سِدریٰ پہ جبریلؑ نے اُتارے پر

صدائے صِدق و صفا تھے، نشانِ پاسِ وفا

جو گھر کا گھر ہی اُٹھا لائے اک اشارے پر

وطن دعائے نبیﷺ کے طفیل ہے کاشف

عطا کے رنگ جھلکتے ہیں چاند تارے پر

کاشف عرفان