صراحی ہے سر محفل نہ دور جام ہے ساقی

 صراحی ہے سر محفل نہ دور جام ہے ساقی

تِری ذات گرامی موردِ الزام ہے ساقی

بگڑتی جا رہی ہے رات دن ترتیب مے خانہ

تِرے کارِ جہاں بینی کا یہ انجام ہے ساقی

مِرے حصے میں آئی ہے فقط دُردِ تہِ مینا

میسر کیوں عدو کو شیرۂ بادام ہے ساقی

نگلتے جا رہے ہیں آشتی کو خوف کے سائے

تِرا دستِ تصرف موت کا پیغام ہے ساقی

گلی کوچوں میں میری حسرتوں کا خون بہتا ہے

یہ کس شیریں ادا کا جلوۂ بے نام ہے ساقی

تِری تو عمر گزری ہے یہاں جادو جگانے میں

یہ کیا کرتوت ہیں جس کا یہ چرچا عام ہے ساقی

جہاں سکے چھنکتے ہیں جہاں پگڑی اچھلتی ہے

وہی تو شہر میں اک کوچۂ بدنام ہے ساقی

نوید جانفزا مرغوب کیا مجھ کو ملے کوئی

تِری حکمت اسیر گردش ایام ہے ساقی

میاں مرغوب