سزائے موت نہ دل کو رہائی دیتا ہے

 سزائے موت نہ دل کو رہائی دیتا ہے

جو اُس کا ہو وہ مسلسل دہائی دیتا ہے

میں سات دن ہی رہا ہوں مگر بہت خوش ہوں

کسی کسی کو وہ دل تک رسائی دیتا ہے

جسے خدا نہیں دِکھتا وہ تم سے آ کے ملے

تمہاری آنکھ سے وہ بھی دکھائی دیتا ہے

وہ نیند میں بھی مجھے دیکھتا ہے اٹھ اٹھ کر

جبیں پہ بوسہ بدن پر رضائی دیتا ہے

اُسی کے پاس ہیں سب چابیاں مِرے دل کی

وہ خود کو چھوڑ کے سب کو رہائی دیتا ہے

لگے جو آنکھ وہ آنکھیں دکھائی دیتی ہیں

وہ مجھ کو خواب میں اب تک دکھائی دیتا ہے

بس ایک میں نہیں چھاوُں میں منتظر تیرا

اداس پیڑ بھی تجھ کو دُہائی دیتا ہے

ہر ایک چاہنے والے کا تجربہ ہے عمیر

ذرا سا قُرب مُسلسل جُدائی دیتا ہے

عمیر مشتاق